អ្នកឃ្លាំមើលការអភិវឌ្ឍសង្គម លោកបណ្ឌិត មាស នី ថ្លែងក្នុងវេទិកាអ្នកស្ដាប់វិទ្យុអាស៊ីសេរី កាលពីថ្ងៃទី៩ ខែឧសភា ឆ្នាំ២០១៧។ Photo: RFA
អ្នកវិភាគមើលឃើញថា ការតែងតាំងកូនប្រសាលោក ហ៊ុន សែន ត្រូវជាកូនប្រុសច្បងរបស់លោក សុខ អាន អតីតរដ្ឋមន្ត្រីទីស្តីការគណៈរដ្ឋមន្ត្រី គឺលោក សុខ ពុទ្ធិវុធ ឲ្យធ្វើជាប្រធានក្រុមប្រឹក្សាភិបាលទូរគមនាគមន៍កម្ពុជា សម្រាប់អាណត្តិទី៥ ឆ្នាំ២០១៨នេះ អាចជាផ្នែកមួយនៃផែនការពង្រីកបណ្ដាញសែស្រឡាយគ្រួសារនិយមរបស់របបលោក ហ៊ុន សែន។
អ្នកវិភាគនយោបាយលោកបណ្ឌិត មាស នី លើកឡើងថា ប្រសិនបើការតែងតាំងលោក សុខ ពុទ្ធិវុធ នាពេលនេះ សមស្របទៅតាមសមត្ថភាពពិតប្រាកដរបស់លោកមែននោះ នោះការតែងតាំងនេះ នឹងមិនចោទជាបញ្ហាអ្វីឡើយ។ ក៏ប៉ុន្តែ លោកថា ផ្ទុយទៅវិញ ការតែងតាំងនេះនឹងក្លាយជាការពង្រីកបណ្ដាញសែស្រឡាយប្រព័ន្ធគ្រួសារនិយម ប្រសិនបើធ្វើឡើងដោយមិនត្រូវតាមជំនាញ សមត្ថភាព និងលក្ខខណ្ឌប្រកួតប្រជែងពិតប្រាកដនោះ៖ «បើសិនជាយើងនិយាយអំពីការតែងតាំងមនុស្សដែលមានសមត្ថភាព នោះវាមិនមានអ្វីខុសនោះទេ។ ក៏ប៉ុន្តែ រឿងដែលសំខាន់នោះ កាលណាបើសិនជាមានការតែងតាំងតាមសែស្រឡាយគ្រួសារបែបនោះ ហើយសមត្ថភាពរបស់បុគ្គលហ្នឹងមិនត្រូវទៅតាមជំនាញដែលគេត្រូវការនៅក្នុងក្រសួង ឬស្ថាប័នហ្នឹងទេ នោះវាគ្រាន់តែជាការផ្ដល់នូវតួនាទី និងកន្លែងឲ្យបក្សពួកនៅក្នុងសង្គមមួយ ឬស្ថាប័នដែលមានបក្សពួកនិយមឲ្យធ្វើការ តែប៉ុណ្ណោះទេ»។
ពិធីតែងតាំងលោក សុខ ពុទ្ធវុធ នេះ ត្រូវមន្ត្រីរបបលោក ហ៊ុន សែន អះអាងថា គឺដើម្បីពង្រឹង និងពង្រីកការងារអាជីវកម្មក្នុងទីផ្សារ ប្រកួតប្រជែង និងបន្តអភិវឌ្ឍន៍វិស័យទូរគមនាគមន៍នៅកម្ពុជា។ ការតែងតាំងនេះ គឺជាការបន្ថែមទៅលើមុខតំណែងមួយចំនួនធំរបស់លោកដែលមានស្រាប់ ក្នុងនោះរួមមាន ជាអនុរដ្ឋលេខាធិការក្រសួងប្រៃសណីយ៍ និងទូរគមនាគមន៍ និងជាប្រធានសហព័ន្ធស្រូវអង្ករកម្ពុជា។
ទូរគមនាគមន៍កម្ពុជា ឬហៅជាភាសាអង់គ្លេសថា Telecom Cambodia គឺជាក្រុមហ៊ុនរបស់រដ្ឋដែលត្រូវបានបង្កើតឡើងកាលពីឆ្នាំ២០០៥ ដើម្បីធ្វើប្រតិបត្តិការបណ្ដាញ និងផ្ដល់សេវាកម្មទូរគមនាគមន៍ដ៏ទូលំទូលាយ ទាំងនៅក្នុង និងនៅក្រៅប្រទេស និងចូលរួមចំណែកអភិវឌ្ឍន៍ហេដ្ឋារចនាសម្ព័ន្ធទូរគមនាគមន៍ និងបច្ចេកវិទ្យាព័ត៌មានវិទ្យានៅកម្ពុជា។ កាលពីពេលអតីតកាល ក្រុមហ៊ុនរដ្ឋមួយនេះ ធ្លាប់ជួបប្រទះនូវរឿងរ៉ាវអាស្រូវពុករលួយផ្ទៃក្នុង កិបកេងប្រាក់ចំណូលរដ្ឋដោយសារការគ្រប់គ្រងមិនត្រឹមត្រូវ និងបានបណ្ដាលឲ្យមានការផ្ទុះការតវ៉ាពីបុគ្គលិក ជាច្រើនលើកច្រើនសា។ ដោយសារមូលហេតុនេះ ក្រុមហ៊ុនរដ្ឋមួយនេះ នៅតែមិនទាន់អាចដាក់បញ្ចូលទៅក្នុងបញ្ជីដាក់លក់ទីផ្សារមូលបត្រកម្ពុជា CSX ដូចក្រុមហ៊ុនរដ្ឋដទៃទៀតបាននៅឡើយទេ រហូតមកទល់សព្វថ្ងៃនេះ។
ភ្លាមៗក្រោយពីការចាញ់ឆ្នោតយ៉ាងច្រើនសន្ធឹកសន្ធាប់ទៅគណបក្សសង្គ្រោះជាតិ ក្រោយការបោះឆ្នោតជាតិឆ្នាំ២០១៣កន្លងទៅ របបលោក ហ៊ុន សែន បានបង្កើតនូវក្រុមការងារបណ្ដាញព័ត៌មានសង្គម ឬហៅថា Cyber War Room ដើម្បីចាំឃ្លាំមើល និងត្រួតពិនិត្យការប្រើប្រាស់ និងបញ្ចេញមតិនានានៅលើប្រព័ន្ធអ៊ីនធឺណិត និងទូរគមនាគមន៍។ ក្រុមការងារនេះ មានលោក ហ៊ុន ម៉ាណែត ជាប្រធាន និងលោក សុខ ពុទ្ធិវុធ ជាអនុប្រធាន។
លោកបណ្ឌិត មាស នី មើលឃើញថា ពលរដ្ឋខ្មែរសព្វថ្ងៃនេះ លែងសូវមានទំនុកចិត្តទៅលើប្រព័ន្ធទូរគមនាគមន៍នៅកម្ពុជាហើយ ដោយសារតែបារម្ភខ្លាចពីការលួចថតសំឡេង ស្ដាប់ពីរបបលោក ហ៊ុន សែន ដែលជាការរំលោភយ៉ាងធ្ងន់ធ្ងរលើសិទ្ធិឯកជន របស់ពួកគេ៖ «ខ្ញុំគិតថា ខ្មែរភាគច្រើនក្នុងពេលនេះ ក៏មានការប្រុងប្រយ័ត្នច្រើនដែរ ដូចជាការនិយាយរឿងផ្សេងៗដែលវាអាចប៉ះពាល់ដល់នយោបាយ ក៏គេមិនហ៊ាននិយាយក្នុងប្រព័ន្ធទូរស័ព្ទធម្មតាទេ គឺគេទៅនិយាយក្នុងប្រព័ន្ធ Whatsapp Telegram ឬក៏នៅ Signal អីជាដើម»។
កន្លងមក មានករណីបែកធ្លាយការលួចថតសំឡេងសន្ទនាឯកជនជាបន្តបន្ទាប់ របស់មន្ត្រីជាន់ខ្ពស់បក្សប្រឆាំង និងសង្គមស៊ីវិល ហើយត្រូវបានប្រព័ន្ធឃោសនាលោក ហ៊ុន សែន យកទៅផ្សព្វផ្សាយបន្តយ៉ាងព្រោងព្រាត បើទោះបីជាខុសច្បាប់ក៏ដោយ។ ការតែងតាំងនេះ អាចជាយុទ្ធសាស្ត្រមួយ ដើម្បីជាការងាយស្រួលសម្រាប់ក្រុមគ្រួសាររលោក ហ៊ុន សែន ដើម្បីគ្រប់គ្រងលើប្រព័ន្ធទំនាក់ទំនងគមនាគមន៍ថែមទៀត។
