6666 News

របបក្រុងភ្នំពេញត្រៀមបង្កើនកងកម្លាំងជាង១០ម៉ឺននាក់ដើម្បីការពារក្នុងថ្ងៃបោះឆ្នោត

សមត្ថកិច្ចបិទទ្វាររបងការិយាល័យបោះឆ្នោត នៃបរិវេណសាលាបឋមសិក្សាព្រែកលៀប សង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ ក្រោយបញ្ចប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់ នៅថ្ងៃទី៤ ខែមិថុនា ឆ្នាំ២០១៧។ Photo: RFA

អ្នកឃ្លាំមើលការបោះឆ្នោតបារម្ភជុំវិញគម្រោងបង្កើនកងកម្លាំងច្រើនក្នុងថ្ងៃបោះឆ្នោត

របបក្រុងភ្នំពេញ ត្រៀមបង្កើនកងកម្លាំងជាង ៨ម៉ឺននាក់ និងប្រជាការពារភូមិជាងពីរម៉ឺននាក់ ដើម្បីការពារក្នុងថ្ងៃបោះឆ្នោត សកលអាណត្តិទី៦ នៅថ្ងៃអាទិត្យ ទី២៩ កក្កដា។ សង្គមស៊ីវិលដាក់សំណើថា ដើម្បីឲ្យស្របច្បាប់បោះឆ្នោត ការិយាល័យមួយ ត្រូវមានកងកម្លាំងការពារត្រឹម ៣នាក់តែប៉ុណ្ណោះ។

សង្គមស៊ីវិលឃ្លាំមើលការបោះឆ្នោតបារម្ភថា ប្រសិនបើកងកម្លាំងនគរបាលជាតិ ប៉េអឹម និងដាក់កម្លាំងប្រជាការពារភូមិ ទៅការពារក្នុងថ្ងៃបោះឆ្នោត លើសពីចំនួនច្បាប់ដែលបានកំណត់ នឹងបង្កឲ្យមានការភ័យខ្លាចដល់ពលរដ្ឋ។ មន្ត្រីអង្កេតជាន់ខ្ពស់នៃអង្គការខុមហ្វ្រែល (COMFREL) លោក កន សាវាង្ស ពន្យល់ថា តាមច្បាប់បោះឆ្នោត គឺក្នុងមួយការិយាល័យបោះឆ្នោតតម្រូវឲ្យមានកងកម្លាំងការពារត្រឹម ៣នាក់ប៉ុណ្ណោះ គឺម្នាក់នៅក្រៅការិយាល័យត្រូវមានអាវុធ ១ដើម និងកងកម្លាំង២នាក់ ដែលត្រូវការពារក្នុងការិយាល័យបោះឆ្នោត មិនតម្រូវឲ្យមានអាវុធទេ។ សង្គមស៊ីវិលរូបនេះ ថា ជារឿងថ្មី សម្រាប់ការបោះឆ្នោតនៅកម្ពុជា ដែលរបបក្រុងភ្នំពេញបញ្ចូលប្រជាការពារភូមិឲ្យចូលរួមការពារ ក្នុងថ្ងៃបោះឆ្នោត ខណៈដែលការបោះឆ្នោតលើកមុនៗ មិនធ្លាប់មានកងកម្លាំងបែបនេះចូលរួម។ ប៉ុន្តែ លោក កន សាវាង្ស ប្រាប់ថា ប្រជាការពារភូមិ មិនមែនជាកងកម្លាំងប្រដាប់អាវុធទេ ដូច្នេះក្រុមនេះត្រូវការការបណ្ដុះបណ្ដាល ការអប់រំពីការបោះឆ្នោត និងសិទ្ធិមនុស្សជាមុនសិន។ «»

អ្នកនាំពាក្យអគ្គស្នងការនគរបាលជាតិ លោក គៀត ច័ន្ទថារិទ្ធ ត្រូវបានគេហទំព័រអគ្គស្នងការនគរបាលជាតិស្រង់សម្ដី នៅព្រឹកថ្ងៃទី១៨ មេសា ក្នុងពិធីបើកវគ្គបណ្ដុះបណ្ដាលគ្រូបង្គោល ស្ដីពីច្បាប់ បទបញ្ជា និងនីតិវិធីសម្រាប់ការបោះឆ្នោត និងក្រមសីលធម៌សម្រាប់ ភ្នាក់ងារសន្តិសុខបោះឆ្នោត នៅអគ្គស្នងការដ្ឋាននគរបាលជាតិ ថា របបក្រុងភ្នំពេញ មានកម្លាំង ដែលត្រូវចូលរួមការពារការបោះឆ្នោតរហូតដល់ទៅ ៨ម៉ឺននាក់ ក្នុងនោះមកពីកងយោធពលខេមរភូមិន្ទ និងកងរាជអាវុធហត្ថ និងមានកម្លាំងប្រជាការពារត្រៀមជួយនៅតាមឃុំសង្កាត់ ក្រុង ស្រុក ខណ្ឌ ប្រមាណ ជាង២ម៉ឺននាក់។

លោក គៀត ច័ន្ទថារិទ្ធ បានប្រាប់គ្រូបង្គោល ដែលបានបណ្ដុះបណ្ដាលថា នៅសល់តែ ១០១ថ្ងៃ ប៉ុណ្ណោះ ដល់ថ្ងៃបោះឆ្នោតហើយ មន្ត្រីដែលចូលរួមការពារបោះឆ្នោតទាំងអស់ ត្រូវមានការយល់ដឹងឲ្យបានគ្រប់ៗគ្នា ដើម្បីធ្វើឲ្យបរិយាកាសនៃការបោះឆ្នោតប្រព្រឹត្តទៅដោយ សេរី ត្រឹមត្រូវ យុត្តិធម៌ និងគ្មានការគំរាមកំហែង។ ប៉ុន្តែ សហគមន៍អន្តរជាតិ បក្សប្រឆាំង និងសង្គមស៊ីវិល មើលឃើញថា បរិយាកាសនៃការបោះឆ្នោតសកលឆ្នាំ២០១៨ នឹងមិនអាចប្រព្រឹត្តទៅដោយសេរី ត្រឹមត្រូវ យុត្តិធម៌ និងគ្មានការគំរាមកំហែងទេ ដោយសារតែរបបក្រុងភ្នំពេញ បានកម្ទេចសំឡេងបក្សប្រឆាំង តាមរយៈការបិទផ្លូវមិនឲ្យបក្សប្រឆាំងបានចូលរួមការបោះឆ្នោតអាណត្តិទី៦។

អគ្គលេខាធិការ គ.ជ.ប លោក ទេព នីថា ថ្លែងក្នុងកិច្ចប្រជុំ ស្ដីពីការផ្សព្វផ្សាយការចាប់ផ្ដើមដំណើរការរៀបចំការបោះឆ្នោតជ្រើសតាំងតំណាងរាស្ត្រ នីតិកាលទី៦ ឆ្នាំ២០១៨ កាលពីថ្ងៃទី១០ មេសា ថា របបក្រុងភ្នំពេញ សម្រេចត្រៀមកម្លាំងចំនួនជាង ៨ម៉ឺន ( ៨៤.៥៨៣) នាក់ ដោយដាក់ពង្រាយតាមការិយាល័យ និងតាមតំបន់ផ្សេងៗ ដើម្បីការពារសន្តិសុខក្នុងការបោះឆ្នោតថ្នាក់ជាតិ ឆ្នាំ២០១៨។

ចំនួនកងកម្លាំងជាងប្រាំបីម៉ឺននាក់ រួមនឹងប្រជាការពារភូមិជាងពីរម៉ឺននាក់ទៀត បើធៀបនឹងការបោះឆ្នោតក្រុមប្រឹក្សាឃុំសង្កាត់ កាលពីខែមិថុនា ឆ្នាំ២០១៧ បានកើនឡើងពាក់កណ្ដាល ដោយការបោះឆ្នោតកាលណោះ កងកម្លាំងដែលចូលរួមការពារក្នុងថ្ងៃបោះឆ្នោតមានជាងប្រាំម៉ឺន ( ៥១.៥៧៨) នាក់។ ការបោះឆ្នោតក្រុមប្រឹក្សាឃុំសង្កាត់ កាលពីខែមិថុនា ឆ្នាំ២០១៧ កងកម្លាំងសមត្ថកិច្ចសរុបត្រូវបានបែងចែកជា ៥ក្រុម រួមមាននគរបាលចំនួនជាង ៣ម៉ឺន (៣៣.៥២៧) នាក់ កងរាជអាវុធហត្ថចំនួនជាង២ពាន់នាក់ (២.៧៨០) នាក់ និងកងខេមរភូមិន្ទ ឬយោធា ចំនួនជាង៤ពាន់(៤.២៧១) នាក់។

សកម្មជនសិទ្ធិមនុស្ស និងសកម្មជនដីធ្លី ធ្លាប់អះអាងថា អាជ្ញាធរបានប្រើប្រាស់ប្រជាការពារប្រើប្រាស់អំពើហិង្សាលើពួកគេ ដោយគ្មានទោសពៃរ៍។

អ្នកវិភាគនយោបាយ លោក ហង្ស វិទូ យល់ថា ការបន្ថែមកងកម្លាំង និងបញ្ចូលប្រជាការពារភូមិ ទៅក្នុងកិច្ចការពារ ក្នុងថ្ងៃបោះឆ្នោត ហាក់បង្ហាញថា របបក្រុងភ្នំពេញត្រៀមជើងការ ខ្លាចមានគេមកដណ្ដើមអំណាច។ លោក ហង្ស វិទូ មើលឃើញថា បើទោះជាបក្សប្រឆាំង បានអំពាវនាវឲ្យពលរដ្ឋ ពហិការ ការបោះឆ្នោត ប៉ុន្តែ បក្សប្រឆាំងមិនមានសមត្ថភាពរំខានថ្ងៃបោះឆ្នោត ដែលត្រូវធ្វើឲ្យរបបក្រុងភ្នំពេញ មានការបារម្ភបែបនេះទេ។ «»

លោកនាយករដ្ឋមន្ត្រី ហ៊ុន សែន មេដឹកនាំរបបក្រុងភ្នំពេញ ធ្លាប់ប្រកាសថា នឹងរៀបចំការបោះឆ្នោត សកល អាណត្តិទី៦ នៅថ្ងៃទី២៩ កក្កដា ឆ្នាំ២០១៨ ទាំងគ្មានវត្តមានរបស់គណបក្សប្រឆាំង។ បើទោះជាមានការព្រមាន ពីរបបក្រុងភ្នំពេញ ថានឹងបង្ក្រាបរាល់ចលនាគាំទ្រគណបក្សប្រឆាំងបែបណាក្ដី ប៉ុន្តែ លោក សម រង្ស៊ី ប្រធានចលនាសង្គ្រោះជាតិ ព្រមានវិញ ថា បន្ថែមពីលើការអំពាវនាវឲ្យពលរដ្ឋពហិការបោះឆ្នោត ក៏នឹងមានចលនាងើបប៉ះបោរនៅកម្ពុជាដែរ ប្រសិនបើរបបក្រុងភ្នំពេញ នៅតែរឹតត្បិតមិនឲ្យបក្សប្រឆាំងបានចូលរួមការបោះឆ្នោត៕

ព្រះសង្ឃប្រតិកម្មចំពោះការចោទព្រះអង្គថា ជាប់ពាក់ព័ន្ធនឹងចលនារណៈសិរ្សរំដោះជាតិខ្មែរ

ព្រៃឈើ

ព្រះតេជព្រះគុណ យិន រតនៈសុធាវី (ខាងស្ដាំ ព្រះហស្ថកាន់ផ្កាឈូក) ពេលចូលរួមធ្វើសមាធិសុំសេចក្តីសុខ នៅលើផ្លូវថ្នល់ មុខសាលសន្និសិទ្ឋចតុមុខ កាលពីឆ្នាំ២០១៣។ ហ្វេសប៊ុកព្រះតេជព្រះគុណ ព្រឹម ហួន

ព្រះតេជព្រះគុណ យិន រតនៈសុធាវី សម្ដែងប្រតិកម្មចំពោះរបបលោក ហ៊ុន សែន ដែលចោទព្រះអង្គថា ជាប់ពាក់ព័ន្ធនឹងចលនារណៈសិរ្សរំដោះជាតិខ្មែររបស់លោក សម សេរី ដែលមានមូលដ្ឋាននៅអឺរ៉ុបនោះថា ជារឿងមិនពិត។ ព្រះអង្គមានថេរដីកាថា ព្រះអង្គគ្រាន់តែជាអ្នកអប់រំផ្នែកពុទ្ធសាសនា និងបង្រៀនអក្សរសាស្រ្តខ្មែរ ដោយផ្អែកលើ ធម៌អហិង្សា និងសន្តិភាព។

ព្រះអង្គបន្ថែមថា ក្រោយពីលោកនាយករដ្ឋមន្រ្តី ហ៊ុន សែន ប្រកាសចោទចលនារណៈសិរ្សរំដោះជាតិខ្មែររបស់ លោក សម សេរី ថា ប៉ុនប៉ងដាក់គ្រាប់បំផ្ទុះនៅទីក្រុងភ្នំពេញ ហើយត្រូវបានឧបករណ៍បំពងសំឡេងរបស់លោក ហ៊ុន សែន យករួបថតព្រះអង្គទៅចុះផ្សាយមក គឺក្រុមសមត្ថកិច្ចជាច្រើននាក់ ឃ្លាំមើលសកម្មភាពរបស់ព្រះអង្គរាល់ថ្ងៃ។ ព្រះតេជព្រះគុណ យិន រតនៈសុធាវី ជាគ្រូសូត្រសាំ្ដ វត្តចំការខ្សាច់ ស្ថិតនៅខណ្ឌដង្កោ រាជធានីភ្នំពេញ និងជាអនុប្រធាន អង្គការខ្ញុំខ្មែរ។

ព្រះតេជព្រះគុណមានថេរដីកាថា រូបថតរបស់ព្រះអង្គ ដែលថតជាមួយលោក សម សេរី ប្រធានចលនារណសិរ្សរំដោះជាតិខ្មែរនោះ គឺជារូបថតតាំងពីឆ្នាំ២០១៣ មកម្លេះ ដែលពលរដ្ឋខ្មែរក្នុងប្រទេសថៃនិមន្តព្រះអង្គឲ្យទៅធ្វើពិធីសូត្រ និងសម្តែងធម្មទេសនាហើយពេលនោះ មានពលរដ្ឋជាច្រើនរួមទាំងលោក សម សេរី ផងដែរ បានសុំព្រះអង្គថតជាមួយ។

ព្រះតេជព្រះគុណមានថេរដីកាទៀតថា ព្រះអង្គមិនដែលមានគំនិត ឬមហិច្ឆតាណាមួយក្នុងការផ្តួលរំលំរបបលោក ហ៊ុន សែន ដូចមានការចោទប្រកាន់នោះទេ។ ព្រះអង្គបន្តថា ព្រះអង្គតែងតែសម្តែងធម៌ដល់មនុស្ស សត្វទាំងពួង ដើម្បីស្គាល់នូវអំពើល្អ អំពើបាប និងបុណ្យប៉ុណ្ណោះ៕

ភ្លៀងកក់ខែលាយខ្យល់កន្ត្រាក់បណ្ដាលឲ្យខូចខាត និងរលំផ្ទះពលរដ្ឋជាច្រើនខ្នង

ជីវិត

2018-04-18

ក្មេងៗ លេងជិតផ្ទះរបស់ប្រជាពលរដ្ឋ នៅឃុំថ្កូវ ស្រុកកំពង់ត្របែក ខេត្តព្រៃវែង ដែលរលំបាក់ ដោយសារខ្យល់កន្ត្រាក់ កាលពីរសៀលថ្ងៃទី១៧ មេសា ឆ្នាំ២០១៨។ រូបថតពីគេហទំព័រហ្វេសប៊ុក ក្រសួងធនធានទឹក និងឧតុនិយម

ភ្លៀងកក់ខែលាយលំនឹងខ្យល់កន្ត្រាក់នៅតាមបណ្ដាខេត្តមួយចំនួន កាលពីរសៀលថ្ងៃទី១៧ មេសា បានបណ្ដាលផ្ទះរបស់ប្រជាពលរដ្ឋជាច្រើនខ្នងបានដួលរលំ និងមួយចំនួនទៀតរបើកដំបូលខូចខាត។

របាយការណ៍ក្រសួងធនធានទឹកនិងឧតុនិយម ឲ្យដឹងនៅថ្ងៃទី១៨ មេសាថា ផ្ទះរបស់ពលរដ្ឋនៅឃុំទួលសាលា ស្រុកបរសេដ្ឋ ខេត្តកំពង់ស្ពឺ រងការខូចខាតចំនួន១៦ ខ្នងផ្ទះ។ ចំណែកនៅឃុំថ្កូវ ស្រុកកំពង់ត្របែក ខេត្តព្រៃវែងបាក់សសររលំផ្ទះពលរដ្ឋមួយខ្នងបណ្ដាលផ្ទះឲ្យខូចខាតទាំងស្រុង ហើយរលំផ្ទះពលរដ្ឋចំនួន ៣ខ្នង និងរបើកដំបូល ២ខ្នង នៅភូមិទួលច្រេសឃុំចំបក់ ស្រុកស្វាយជ្រំ ខេត្តស្វាយរៀង។ ក្រសួងឲ្យដឹងទៀតថា នៅខេត្តប៉ៃលិនឯណោះវិញ មានភ្លៀងកក់ខែមួយធំរយៈពេលប្រមាណ ២ម៉ោង ដែលមានកម្ពស់ទឹកកម្រិតពី ៧៧ ទៅ ៩៥មិល្លីម៉ែត្រ ហើយបង្កឲ្យទឹកហក់ឡើងពេញព្រៀប នៅតាមស្ទឹង និងដងអូរជាច្រើនកន្លែងក្នុងខេត្តមួយនេះឡើងយ៉ាងឆាប់រហ័ស។ ប៉ុន្តែពុំបណ្ដាលឲ្យមនុស្សស្លាប់ និងរងរបួសនោះទេ។

ក្រសួងព្យាករឲ្យដឹងទៀតថា ភ្លៀងកក់ខែនឹងនៅបន្តកើតមានរាយប៉ាយនៅទូទាំងប្រទេស រហូតដល់ថ្ងៃទី២១ មេសា ហើយសីតុណ្ហភាពនឹងថយចុះ ចន្លោះពី ៣០ ទៅ ៣១អង្សាសេ រហូតដល់ចុងខែមេសា៕

“កម្ពុជាពុំទាន់សុខសន្តិភាពពេញលេញដែលក្លាយជាគោលដៅទេសចរនៅឡើយទេ”

វប្បធម៏

RFA

ទេសចរដើរកម្សាន្តនៅប្រាសាទអង្គរវត្ត ខេត្តសៀមរាប ក្នុងពិធីបុណ្យចូលឆ្នាំចិន-វៀតណាម ឆ្នាំ២០១៨។ រូបថតក្រសួងទេសចរណ៍

ប្រជាពលរដ្ឋ និងអ្នកវិភាគ មើលឃើញថា ប្រទេសកម្ពុជាសព្វថ្ងៃ ពុំទាន់មានសន្តិភាពពេញលេញ និងមិនទាន់ក្លាយទៅជាគោលដៅទេសចរណ៍ធំ នៅអាស៊ីនៅឡើយទេ ព្រោះតែកត្តាជម្លោះនយោបាយ បញ្ហាអសន្តិសុខសង្គម និងសណ្ដាប់ធ្នាប់សាធារណៈ។ ការលើកឡើងនេះ បន្ទាប់ពីលោក ហ៊ុន សែន អះអាងថា សន្តិភាពបានធ្វើឲ្យកម្ពុជា ក្លាយជាគោលដៅទេសចរណ៍ធំបំផុតមួយនៅអាស៊ី។

ប្រជាពលរដ្ឋ និងអ្នកវិភាគ សំដែងមតិផ្សេងគ្នា ពីការលើកឡើងរបស់លោកនាយករដ្ឋមន្ត្រី ហ៊ុន សែន ដែលតែងតែនិយាយមុនពេលបោះឆ្នោតថា ប្រទេសកម្ពុជា កំពុងតែក្លាយទៅជាគោលដៅទេសចរណ៍ដ៏ដំបំផុត ព្រោះតែសន្តិភាពដែលរបបលោកខិតខំដណ្ដើមបាននិងការពាររហូតមក។

បុរសម្នាក់ដែលមានបទពិសោធរត់រ៉ឺម៉កម៉ូតូកងបីជិត ១០ឆ្នាំ នៅនៅតំបន់ទេសចរដ៏ធំមួយ នាទីរួមខេត្តសៀមរាប លោក ធាតុ ថា រៀបរាប់ថា ភាពកក់ក្ដៅនៃសន្តិភាពដែលលោកហ៊ុន សែន តែងតែអួតនោះ គឺគ្រាន់តែជា «ភាពកក់ក្ដៅដូចការអាំងផេះ» ប៉ុណ្ណោះ។ លោកបន្តថា ភ្ញៀវទេសចរ មិនឃើញសម្រុកមកប្រទេសកម្ពុជាជាហូរហែច្រើន ដូចការអះអាងរបស់លោក ហ៊ុន សែន នោះទេ។ «»

អ្នករត់រ៉ឺម៉កម៉ូតូកងបីរូបនេះ បន្ថែមថា មូលហេតុដែលភ្ញៀវទេសចរអឺរ៉ុបធ្លាក់ចុះនៅប៉ុន្មានឆ្នាំចុងក្រោយនេះ ប្រហែលអាចបណ្ដាលមកពីជម្លោះនយោបាយ និងបញ្ហាអសន្តិសុខក្នុងសង្គមជាដើម។ លោកឲ្យដឹងដែរ ថា ការធ្លាក់ចុះភ្ញៀវទេសចរណ៍អឺរ៉ុបនេះ ធ្វើឲ្យអ្នកបម្រើសេវាកម្មដឹកជញ្ជូនភ្ញៀវដូចលោក ពុំសូវរកចំណូលបានច្រើនដូចមុនឡើយ។ «»

មិនខុសគ្នាប៉ុន្មានឡើយ ប្រជាពលរដ្ឋម្នាក់ទៀត រស់នៅទីរួមខេត្តព្រះសីហនុ រៀបរាប់ថា ក្នុងពេលបច្ចុប្បន្ននេះ ប្រទេសកម្ពុជា ពុំទាន់មានសុខសន្តិភាពពេញលេញ ហើយក្លាយជាគោលដៅទេសចរណ៍ធំបំផុតមួយនៅអាស៊ីនោះទេ។ ការលើកឡើងរបស់លោក ហ៊ុន សែន ប្រហែលជាមានចេតនា ចង់បន្លំភ្នែកប្រជាពលរដ្ឋ ដើម្បីកេងចំណេញសន្លឹកឆ្នោតពីរឿងសន្តិភាព នៅពេលបោះឆ្នោតមកដល់ប៉ុណ្ណោះ។ «»

ការលើកឡើងរបស់ប្រជាពលរដ្ឋនេះ បន្ទាប់ពីលោក ហ៊ុន សែន បានសរសេរបង្ហោះនៅលើទំព័រហ្វេសប៊ុក (Facebook) របស់លោកថា សង្ក្រាន្តអង្គរ ឆ្នាំថ្មីកន្លងទៅនេះគឺបានទាក់ទាញទេសចរណ៍ជាតិ និងអន្តរជាតិយ៉ាងច្រើនសន្ធឹកសន្ធាប់ មិនថាតែនៅសៀមរាបអង្គរទេ គឺនៅតាមតំបន់សមុទ្រក៏ មានភ្ញៀវទេសចរច្រើនដែរ។ ទន្ទឹមគ្នានេះលោក ហ៊ុន សែន អះអាងថា ប្រជាពលរដ្ឋខ្មែរមួយចំនួន ក៏បានចេញទៅកម្សាន្តនៅក្រៅប្រទេសដែរ ខណៈដែលជើងហោះហើរកំពុងប្រកួតប្រជែង និងមាន តម្លៃថោក។

លោក ហ៊ុន សែន សរសេរបន្ថែមទៀតថា កម្ពុជាពេលនេះ កំពុងក្លាយជាទិសដៅទេសចរណ៍ដ៏ធំ បំផុតមួយនៅអាស៊ី ខណៈដែលជនរួមជាតិកំពុងរស់នៅសុខសាន្ត និងស្របពេលប្រទេសជាតិកំពុង រីកចម្រើនបោះជំហានទៅមុខ គឺដោយសារតែមានសន្តិភាពពេញលេញអស់រយៈ ពេលជាង២០ឆ្នាំ មកហើយ។ លោក ហ៊ុន សែន បន្តថា មិនត្រូវអោយសន្តិភាព របូតចេញពីដៃនោះទេ ទោះជាក្នុងកាលៈទេសៈណាក៏ដោយ។

រីឯអ្នកស្រាវជ្រាវការអភិវឌ្ឍសង្គម និងជាអ្នកវិភាគឯករាជ្យលោកបណ្ឌិត មាស នី មានប្រសាសន៍ថា ថ្វីដ្បិតតែកម្ពុជា ពុំមានសង្គ្រាមប្រដាប់អាវុធ ដូចនៅប្រទេសថៃដែលកំពុងមានជម្លោះជាមួយមូស្លីមថៃ (Muslim) នៅភាគខាងត្បូងក្តី ប៉ុន្តែចំនួនភ្ញៀវទេសចរណ៍បរទេសចូលមកកម្ពុជា នៅតែមិនអាច ប្រៀបធៀបជាមួយចំនួនភ្ញៀវទេសចរនៅប្រទេសថៃ និងប្រទេសជិតខាងបានដែរ។ «»

លោកបណ្ឌិត មាស នី សម្ដែងការព្រួយបារម្ភដែរថា ប្រសិនបើស្ថានភាពនយោបាយបន្តអាប់អួទៀត នោះ វានឹងអាចនាំឲ្យប៉ះពាល់ដល់វិស័យទេសចរណ៍ដែរ។ លោកបន្ថែមថា ទោះបីជារដ្ឋាភិបាល នៅតែប្រកាន់ជំហរថា កម្ពុជាមានសន្តិភាពក្តី ប៉ុន្តែការពិត គឺនៅមិនទាន់មានសន្តិភាពផ្លូវចិត្តក្នុង ចំណោមប្រជាពលរដ្ឋខ្មែរនៅឡើយទេ បន្ទាប់ពីឆន្ទៈអ្នកគាំទ្រគណបក្សប្រឆាំងជាង ៣លាន ត្រូវបានរបបលោក ហ៊ុន សែន រំលាយ និងរំលោភយក។ លោកស្នើសុំឲ្យរដ្ឋាភិបាល ត្រូវធ្វើយ៉ាងណាធានា ឲ្យមានការឯកភាពជាតិឡើងវិញ។ «»

របាយការណ៍ក្រសួងទេសចរណ៍ស្ដីពីចំនួនភ្ញៀវទេសចរជាតិ និងអន្តរជាតិ ធ្វើដំណើរកម្សាន្តនៅកម្ពុជា ក្នុងពិធីបុណ្យចូលឆ្នាំថ្មីប្រពៃណីជាតិ ពីថ្ងៃទី១៤ ដល់ថ្ងៃទី១៦ ខែមេសានេះ បញ្ជាក់ថា ស្ថិតិភ្ញៀវទេសចរជាតិដែលធ្វើដំណើរកម្សាន្តនៅទូទាំងប្រទេសកម្ពុជា ក្នុងឱកាសបុណ្យចូលឆ្នាំថ្មីប្រពៃ ណីជាតិខ្មែរ មានចំនួនជាង ៥លាន ១សែននាក់ (៥,១១២,៩៦៩)។ ចំណែកភ្ញៀវទេសចរអន្តរជាតិមានចំនួនជិត ៩ម៉ឺននាក់ (៨៨,១៩១នាក់)។ ក្នុងនោះភ្ញៀវទេសចរជាតិ និងអន្តរជាតិដែលបានចូលរួមទស្សនាដំណើរកម្សាន្ត អង្គរសង្ក្រាន្តខេត្តសៀមរាបមានចំនួនជិត ២លាននាក់។ ប៉ុន្តែពលរដ្ឋប្រកបអាជីវកម្មអាស្រ័យវិស័យទេសចរណ៍បញ្ជាក់ថា ភ្ញៀវទេសចរអន្តរជាតិមកកម្សាន្តនៅខេត្តសៀមរាបមានចំនួនតិចតួច ក្នុងពេលចូលឆ្នាំថ្មី។

ប្រជាពលរដ្ឋ និងអ្នកវិភាគ ផ្ដល់យោបល់ថា ដើម្បីទាក់ទាញភ្ញៀវទេសចរឲ្យបានច្រើននោះ របប លោក ហ៊ុន សែន និងប្រជាពលរដ្ឋ ត្រូវអនុវត្តលើការពង្រឹងធនធានមនុស្ស សេវាកម្ម អភិវឌ្ឍន៍លើតំបន់ទេសចរណ៍ រៀបចំសណ្ដាប់ធ្នាប់ និងលុបបំបាត់អំពើអសន្តិសុខជាដើម។ លើសពីនេះ របប លោក ហ៊ុន សែន ក៏ល្មមដល់ពេលដែលគួរតែយកបទពិសោធន៍នៃវិនាសកម្មពីការបែកបាក់គ្នានេះ មកធ្វើជាមេរៀនដើម្បីប្រែក្លាយជាតិឲ្យមានសាមគ្គីភាព និងអភិវឌ្ឍជាតិឲ្យបានត្រឹមត្រូវពិតប្រាកដជាជាងគ្រាន់អួតក្ដែងៗ ដើម្បីស្វែងរកសន្លឹកឆ្នោតប៉ុណ្ណោះ៕

ពលរដ្ឋដែលព្រមទទួលសំណងពីក្រុមហ៊ុននៅសេសានត្អូញពីដំណោះស្រាយសំណង

ជីវិត

ទិដ្ឋភាពទឹកជំនន់នៅខ្សែទឹកខាងលើនៃភូមិស្រែគរចាស់ ឃុំស្រែគរ ស្រុកសេសាន ខែត្រស្ទឹងត្រែង កាលពីថ្ងៃទី១៣ ខែតុលា ឆ្នាំ ២០១៧។ Photo Provided

ពលរដ្ឋដែលទើបតែយល់ព្រមទទួលសំណង ពីក្រុមហ៊ុនទំនប់វារីអគ្គិសនីសេសានក្រោមពីរប្រមាណជាង ៥០គ្រួសារនៅខេត្តស្ទឹងត្រែង ត្អូញត្អែរពីភាពយឺតយ៉ាវក្នុងការផ្ដល់សំណងដីកសិកម្មជូនពួកគាត់ក្នុងមួយគ្រួសារ ៥ហិកតារ និង ២ហិកតារ សម្រាប់ពលរដ្ឋបំបែកគ្រួសារ។ បញ្ហានេះ បង្កឲ្យពួកគាត់ខកខានមិនបានធ្វើកសិកម្មចិញ្ចឹមជីវិត និងខ្វះខាតស្បៀងអាហារ។

ពលរដ្ឋរស់នៅភូមិស្រែគរថ្មី ឃុំស្រែគរ ស្រុកសេសាន ឲ្យដឹងថា អ្នកភូមិដែលទើបតែយល់ព្រមទទួលសំណងពីក្រុមហ៊ុនទំនប់វារីអគ្គិសនីសេសានក្រោមពីរ នៅឃុំស្រែគរ ប្រមាណ ៥០គ្រួសារថ្មីទៀតមិនទាន់ទទួលបានដីកសិកម្មក្នុងមួយគ្រួសារ ៥ហិកតារ និង២ហិកតារ សម្រាប់ពលរដ្ឋបំបែកគ្រួសារនៅឡើយទេ បើទោះបីជាពួកគាត់បានស្នើទៅអាជ្ញាធរមូលដ្ឋាន និងក្រុមហ៊ុនជាច្រើនសាក្តី។ ចំណែកពលរដ្ឋជាង ៥រយគ្រួសារផ្សេងទៀត ដែលទទួលបានដីកសិកម្ម ៥ហិកតារ ភាគច្រើននៅមិនទាន់អាចដាំដុះបានដែរ ដោយសារដីដែលពួកគាត់ទទួលបានសុទ្ធសឹងជាដីព្រៃរេចរឹល ហើយផ្នែកខ្លះត្រូវទឹកលិច។

ពលរដ្ឋមួយគ្រួសារដែលយល់ព្រមទទួលសំណងរស់នៅឃុំស្រែគរ លោក សៀក ខាន់ ឲ្យដឹងនៅថ្ងៃទី១៨ មេសា ថា គ្រួសាររបស់លោកទទួលបានដីកសិកម្ម ២ហិកតារ ជាគោលនយោបាយសំណងជាង ២ឆ្នាំមកហើយ ក្រុមហ៊ុនមិនទាន់វាស់វែង និងកំណត់ទីតាំង ឈូសឆាយឲ្យបានច្បាស់លាស់ទេ បណ្ដាលឲ្យលោកគ្មានដីធ្វើកសិកម្មឆ្នាំនេះ ខណៈរដូវវស្សាកាន់តែកៀកមកដល់។ លោកអង្កេតឃើញថា អ្នកភូមិស្រែគរថ្មីប្រមាណ ៧០ភាគរយ នៅមិនទាន់អាចមានលទ្ធភាពធ្វើកសិកម្មលើដីដែលក្រុមហ៊ុនផ្តល់ជូននៅឡើយទេ ហើយដីប្រមាណជាង ២ពាន់ ៥រយហិកតារ (២.៥០០)នោះភាគច្រើនសំបូរដោយព្រៃរេចរឹល ហើយនៅតំបន់ខ្លះជាដីទួលខ្ពស់ និងផ្នែកខ្លះជាដីលិចទឹក៖ «អ្នកមកមុនគេបាន តែអ្នកក្រោយមិនទាន់បានទេ។ បំបែកគ្រួសារមិនទាន់បាន ក្រុមហ៊ុនថាថ្ងៃនេះ ថ្ងៃនោះ។ ខ្ញុំពិបាកណាស់អត់មានដីធ្វើស្រែ»។

ពលរដ្ឋម្នាក់ទៀតរស់នៅភូមិស្រែគរថ្មី ថ្លែងសុំមិនបញ្ចេញឈ្មោះ ដោយបារម្ភពីសុវត្ថិភាព ឲ្យដឹងថា ដីកសិកម្មរបស់ពលរដ្ឋ ៣០គ្រួសារ ត្រូវទឹកលិចមិនអាចធ្វើកសិកម្មបាន ហើយក្រុមហ៊ុន និងអាជ្ញាធរនៅមិនទាន់ដោះស្រាយនៅឡើយទេ។ លោកថា ដីកសិកម្មដែលលោកទទួលបានពីក្រុមហ៊ុន ៥ហិកតារ ត្រូវទឹកលិចអស់ហើយ ដី៣ហិកតារទៀត នៅមិនទាន់ត្រូវបានក្រុមហ៊ុនផ្ដល់ទីតាំងផ្សេងជំនួសនៅឡើយ ដែលនាំឲ្យគ្រួសាររបស់លោកខកខានមិនអាចដាំដុះបាន និងប្រឈមខ្វះខាតស្បៀងនាពេលខាងមុខ៖ «ទឹកលិចអស់ហើយដី៥ហិកតារ ឲ្យឈូសថ្មីមិនទាន់ឈូសថ្មី។ បើខ្ញុំទទួលបានដី ៥ហិកតារកន្លងមកគឺខ្ញុំអត់បាយ»។

ដីព្រៃស្រោងជាង ២ពាន់ហិកតារ (២.៥០០) របស់រដ្ឋ ឋិតក្នុងស្រុកសេសាន ខែត្រស្ទឹងត្រែង ត្រូវបានក្រុមហ៊ុនទំនប់វារីអគ្គិសនីសេសានក្រោមពីរ ឈូសឆាយកំណត់ជាគោលនយោបាយសំណង និងបែងចែកជូនពលរដ្ឋមួយគ្រួសារ ៥ហិកតារ ស្មើៗគ្នា រីឯពលរដ្ឋបំបែកគ្រួសារក្រុមហ៊ុនសម្រេចផ្ដល់ជូន ២ហិកតារផ្សេងទៀត។

មេឃុំស្រែគរថ្មី មកពីគណបក្សប្រជាជនកម្ពុជា លោក ហ្វឿន ជឿន លើកឡើងថា អាជ្ញាធរបានកំណត់ដីផ្ដល់សំណងជូនពលរដ្ឋដែលទើបតែព្រមទទួលសំណងនៅឃុំស្រែគររួចហើយ តែមន្ត្រីសូរិយោដីនៅមិនទាន់ចុះវាស់វែង និងបង់លេខឲ្យពួកគាត់ចាប់ឆ្នោតនៅឡើយទេ ដោយសាររវល់បុណ្យចូលឆ្នាំថ្មី។ លោកទទួលស្គាល់ថា ពលរដ្ឋនៅតែប្រឈម ខកខានមិនអាចធ្វើកសិកម្មបាន ដោយសារដំណោះស្រាយបញ្ហាដីធ្លីមួយចំនួន នៅមិនទាន់ដោះស្រាយចប់៖ «បើនិយាយទៅ គាត់កៀកមែន ខាងខេត្ត និងក្រុមហ៊ុន ដូចយឺតយ៉ាវពេក រាល់ថ្ងៃនេះពិបាក។ បើពលរដ្ឋគាត់ព្រួយបារម្ភអ៊ីចឹង វាពិបាកហើយធ្វើម៉េចធ្លាក់ភ្លៀងមួយមេពីមេហើយ»។

មេឃុំជាប់ឆ្នោតមកពីគណបក្សសង្គ្រោះជាតិ លោក សៀក មេគង្គ អង្កេតឃើញថា ច្រើនឆ្នាំមកហើយដែលពលរដ្ឋខកខានមិនអាចដាំដុះបាន ដោយសារភាពមិនច្បាស់លាស់ក្នុងការភ្ជួររាស់ដីធ្លី និង ភាពយឺតយ៉ាវក្នុងការផ្ដល់សំណងរបស់ក្រុមហ៊ុន។ លោកថា រហូតមកទល់ពេលនេះពលរដ្ឋតិចតូចណាស់ ដែលមានលទ្ធភាពដាំដុះបាន និងភ្ជួររាស់ដោយខ្លួនឯង ដោយសារដីកសិកម្មដែលក្រុមហ៊ុនចែកជូនពលរដ្ឋភាគច្រើនជាដីនៅតំបន់ព្រៃរេចរឹល និងត្រូវចំណាយប្រាក់ច្រើនក្នុងការកាប់រាន និងឈូសឆាយ៖ «ប្រជាពលរដ្ឋបើនិយាយរួមទៅ ខ្ញុំឲ្យផ្ដល់យោបល់គាត់ តែគាត់មិនហ៊ានទេ មិនមែនសេរីភាពដូចមុនទេ ជួបជុំគ្នា ២០នាក់ បដិវត្តពណ៌។ គាត់មកសំណូមពរខ្ញុំ គ្មានពីណាហ៊ាននិយាយទេ មានតែខ្ញុំចេញមតិយោបល់តាមអាស៊ីសេរីរហូត»។

មកទល់ពេលនេះ ពលរដ្ឋដែលយល់ព្រមទទួលសំណងផលប៉ះពាល់ទំនប់វារីអគ្គិសនីសេសានក្រោមពីរ នៅឃុំស្រែគរ និងបានមកតាំងទីលំនៅថ្មី នៅតំបន់នោះមានចំនួនជាង ៥២០គ្រួសារក្នុងចំណោមពលរដ្ឋ ៥៧០គ្រួសារ ហើយបច្ចុប្បន្ននៅសល់ពលរដ្ឋ ៥០គ្រួសារនៅឃុំស្រែគរ និងពលរដ្ឋ ៥៨គ្រួសារនៅឃុំក្បាលរមាស មិនព្រមទទួលយកគោលនយោបាយសំណង ខណៈដែលផ្ទះរបស់ពួកគេត្រូវទឹកលិចទាំងស្រុង៕

កូនប្រសារលោក ហ៊ុន សែន ត្រូវបានតែងតាំងជាប្រធានក្រុមប្រឹក្សាភិបាលទូរគមនាគមន៍កម្ពុជា

Cambodia News

លោក សុខ ពុទ្ធិវុធ នៅក្នុងពិធីសម្ភោធសមិទ្ធផលផ្សេងៗ ក្នុងវត្តព្រៃមៀន ស្ថិតក្នុងឃុំព្រៃស្លឹក ស្រុកទ្រាំង ខេត្តតាកែវ នៅថ្ងៃទី១៩ ខែតុលា ឆ្នាំ២០១៧។ រូបថតផ្សព្វផ្សាយលើទំព័រហ្វេសប៊ុករដ្ឋបាលខេត្តតាកែវ

កូនប្រុសច្បងរបស់លោក សុខ អាន អតីតរដ្ឋមន្រ្តីទីស្តីការគណៈរដ្ឋមន្រ្តី និងជាកូនប្រសាររបស់លោក ហ៊ុន សែន គឺលោក សុខ ពុទ្ធិវុធ ដែលល្បីឈ្មោះជំនាញខាងបាញ់សម្លាប់សត្វព្រៃរំលោភច្បាប់នៅកម្ពុជា និងមានទ្រព្យសម្បតិ្តមហាសាលទាំងនៅវ័យក្មេងនោះ ត្រូវបានតែងតាំងជាប្រធានក្រុមប្រឹក្សាភិបាលទូរគមនាគមន៍កម្ពុជា សម្រាប់អាណត្តិទី៥ ឆ្នាំ២០១៨ នេះ។

ការតែងតាំងនេះ គឺជាការបន្ថែមទៅលើមុខតំណែងមួយចំនួនធំរបស់លោក ដែលមានស្រាប់ ក្នុងតំណែងទាំងនោះ រួមមាន ជាអនុរដ្ឋលេខាធិការក្រសួងប្រៃសណីយ៍ និងទូរគមនាគមន៍ និងជាប្រធានសហព័ន្ធស្រូវអង្ករកម្ពុជា។ ពិធីតែងតាំងលោក សុខ ពុទ្ធិវុធ នេះ ត្រូវមន្រ្តីរបបលោក ហ៊ុន សែន អះអាងថា គឺដើម្បីពង្រឹង និងពង្រីកការងារអាជីវកម្មក្នុងទីផ្សារ ប្រកួតប្រជែង និងបន្តអភិវឌ្ឍន៍វិស័យទូរគមនាគមន៍នៅកម្ពុជា។

ទូរគមនាគមន៍កម្ពុជា ឬហៅជាភាសាអង់គ្លេសថា Telecom Cambodia គឺជាក្រុមហ៊ុនរបស់រដ្ឋ ដែលត្រូវបានបង្កើតឡើង កាលពីឆ្នាំ២០០៥ ដើម្បីធ្វើប្រតិបត្តិការបណ្តាញ និងផ្តល់សេវាកម្មទូរគមនាគមន៍ដ៏ទូលំទូលាយ ទាំងនៅក្នុង និងនៅក្រៅប្រទេស និងចូលរួមចំណែកអភិវឌ្ឍន៍ហេដ្ឋារចនាសម្ព័ន្ធទូរគមនាគមន៍ និងបច្ចេកវិទ្យាព័ត៌មានវិទ្យានៅកម្ពុជា។ កាលពីពេលអតីតកាល ក្រុមហ៊ុនរដ្ឋមួយនេះ ធ្លាប់ជួបប្រទះនូវរឿងរ៉ាវអាស្រូវពុករលួយផ្ទៃក្នុង កឹបកេងប្រាក់ចំណូលរដ្ឋ ដោយសារការគ្រប់គ្រងមិនត្រឹមត្រូវ និងបានបណ្តាលឲ្យមានការផ្ទុះការតវ៉ាពីបុគ្គលិក ជាច្រើនលើកច្រើនសា។ ដោយសារមូលហេតុនេះ ក្រុមហ៊ុនរដ្ឋមួយនេះ នៅតែមិនទាន់អាចដាក់បញ្ចូលទៅក្នុងបញ្ជីដាក់លក់ទីផ្សារមូលបត្រកម្ពុជា CSX ដូចក្រុមហ៊ុនរដ្ឋដទៃទៀតបាននៅឡើយទេ រហូតមកទល់សព្វថ្ងៃនេះ។

លោក សុខ ពុទ្ធិវុធ កើតក្នុងឆ្នាំ១៩៨០ គឺជាកូនប្រុសម្នាក់ក្នុងចំណោមកូន ៥នាក់ របស់លោក សុខ អាន។ លោកបានរៀបការជាមួយកូនស្រីពៅរបស់លោក ហ៊ុន សែន គឺអ្នកស្រី ហ៊ុន ម៉ាលី។ មួយខែក្រោយមរណភាពឪពុករបស់លោក កាលពីដើមខែមីនា ឆ្នាំ២០១៧ ក្នុងរូបភាពបែកធ្លាយជាច្រើននៅតាមបណ្តាញសង្គមហ្វេសប៊ុក បង្ហាញថា លោក សុខ ពុទ្ធិវុធ គឺជាអ្នកចូលចិត្តបាញ់សម្លាប់សត្វព្រៃ ដែលជាអំពើល្មើសច្បាប់មួយនៅកម្ពុជា ហើយដែលអាចប្រឈមនឹងការដាក់ពន្ធនាគារពី ១ឆ្នាំ ដល់ ៥ឆ្នាំ។

របាយការណ៍អង្គការឃ្លាំមើលពិភពលោក Global Witness ស្តីពីការក្តោបក្តាប់អាជីវកម្មនៅកម្ពុជា របស់អធិរាជត្រកូល ហ៊ុន ឲ្យដឹងថា ទាំងលោក សុខ ពុទ្ធិវុធ និងទាំងភរិយារបស់លោក គឺជាម្ចាស់ក្រុមហ៊ុនអាជីវកម្មខ្នាតធំយ៉ាងហោចណាស់ ១៣ក្រុមហ៊ុននៅកម្ពុជា ដែលមានទឹកប្រាក់វិនិយោគរាប់រយលានដុល្លារ រកស៊ីខាងវិស័យសំណង់ ថាមពល នាវាដឹកភ្ញៀវទេសចរ ភោជនីយដ្ឋាន និងលក់ថ្នាំពេទ្យជាដើម។

កូនៗ របស់លោក សុខ អាន សុទ្ធតែមានតួនាទីធំៗ ក្នុងជួររបបលោក ហ៊ុន សែន ដែលបង្ហាញឲ្យឃើញពីអំពើបក្សពួកខ្សែស្រឡាយនិយមជាប្រព័ន្ធនៅក្នុងរបបនេះ។ កូនប្រុសទី២ លោក សុខ អាន គឺលោក សុខ សូកេន មានតួនាទីជាអនុរដ្ឋលេខាធិការក្រសួងការបរទេស ហើយជាកូនប្រសាររដ្ឋមន្ត្រីក្រសួងឧស្សាហកម្ម និងសិប្បកម្មលោក ចម ប្រសិទ្ធ។ កូនប្រុសទី៣ គឺលោក សុខ សូកាន ជាតំណាងរាស្ត្រមណ្ឌលតាកែវ និងកូនប្រុសពៅ គឺលោក សុខ សង្វារ គឺជាអគ្គនាយករងនៃអាជ្ញាធរជាតិអប្សរា។ កាលនៅមានជីវិត ឪពុករបស់លោក គឺលោក សុខ អាន ត្រូវបានសារព័ត៌មានជាតិ និងអន្តរជាតិ ដាក់រហ័ស្សនាមឲ្យថា ជា «ព្រះនរាយណ៍» ដែលគ្រប់គ្រងស្ថាប័នរដ្ឋរហូតដល់ទៅ ៤៨ស្ថាប័ន ដែលសុទ្ធតែជាស្ថាប័នក្តោបក្តាប់ចំណូលជាតិសំខាន់ៗ នៅទូទាំងប្រទេស៕

ព្រឹទ្ធសភាកម្ពុជាអនុម័តសេចក្តីព្រាងច្បាប់ការពារសុខភាពសាធារណៈ ពេលមានអាសន្ន

Cambodia News

ព្រឹទ្ធសភាកម្ពុជា

19 មេសា 2018
ហ៊ុល រស្មី
វីអូអេខ្មែរ

«ប៉ុន្តែ យើងផ្តល់ឲ្យអាជ្ញាប័ណ្ណ ក៏យើងជូនព័ត៌មានទៅអគ្គក្រុមប្រឹក្សានៃអង្គការពាណិជ្ជកម្មក្រៅប្រទេសពាណិជ្ជកម្មពិភពលោកដែរ មុននឹងប្រតិបត្តិនៅកម្ពុជានេះ»។

ភ្នំពេញ —

ព្រឹទ្ធសភាកម្ពុជាសម្រាប់នីតិកាលទីបី ដែលជិតនឹងផុតអាណត្តិ បានផ្តល់សេចក្តីទុកចិត្ត ឲ្យមានការប្រើបា្រស់ អាជ្ញាប័ណ្ណបញ្ជាសម្រាប់សុខភាពសាធារណៈ ដែលមានវិសាលភាពពាក់ព័ន្ធនឹងផលិតផលឱសថ ដែលការពារដោយប្រកាសនីយបត្រតក្កកម្ម ក្នុងកាលៈទេសៈប្រទេសជាតិមានភាពអាសន្ន ឬកាលៈទេសៈបន្ទាន់បំផុត។

ព្រឹទ្ធសភាកម្ពុជា ដែលគ្របដណ្តប់ដោយសមាជិកមកពីគណបក្សកាន់អំណាចបានបោះឆ្នោត អនុម័តសេចក្តីព្រាងច្បាប់ស្តីពី អាជ្ញាប័ណ្ណបញ្ជាសម្រាប់សុខភាពសាធារណៈ ដើម្បីជំរុញការទទួលបាននូវផលិតផលឱសថ។ នេះបើយោងតាមសេចក្តីប្រកាសរបស់ព្រឹទ្ធសភាដែលចេញផ្សាយជាសាធារណៈនៅថ្ងៃពុធ។

យោងតាមសេចក្តីប្រកាសចុះថ្ងៃទី១៨ ខែមេសា ឆ្នាំ ២០១៨ បានបញ្ជាក់ឲ្យដឹងថា មានសមាជិកព្រឹទ្ធសភាចំនួន៤៧រូប ក្នុងចំណោមសមាជិកទាំងអស់៤៨រូប ដែលបានបោះឆ្នោតអនុម័តសេចក្តីព្រាងច្បាប់នេះ។

រូបឯកសារ៖ លោក សាយ ឈុំ អនុប្រធានគណបក្សប្រជាជនកម្ពុជា នៅក្នុងថ្ងៃទី១ នៃយុទ្ធនាការឃោសនាបោះឆ្នោតឃុំ សង្កាត់ ក្នុងរាជធានីភ្នំពេញ នៅថ្ងៃទី២០ ខែឧសភា ឆ្នាំ២០១៧។

សេចក្តីប្រកាសរបស់ព្រឹទ្ធសភាដឹកនាំដោយលោក សាយ ឈុំ ដែលជាអនុប្រធានគណបក្សប្រជាជនកម្ពុជា បានបញ្ជាក់ឲ្យដឹងតាមន័យដើមថា៖

«សេចក្តីព្រាងច្បាប់ស្តីពី អាជ្ញាប័ណ្ណបញ្ជាសម្រាប់សុខភាពសាធារណៈមាន…គោលបំណងលើកកម្ពស់សិទ្ធិទទួលបាននូវផលិតផលឱសថ សម្រាប់សុខភាពសាធារណៈ តាមរយៈការផ្តល់អាជ្ញាប័ណ្ណបញ្ជាឲ្យផលិតនាំចេញ និងនាំចូលនូវផលិតផលឱសថ ក្នុងកាលៈទេសៈប្រទេសជាតិមានអាសន្ន ឬកាលៈទេសៈបន្ទាន់ផ្សេងទៀត ឬប្រើប្រាស់ជាសាធារណៈមិនមានលក្ខណៈពាណិជ្ជកម្ម ឬស្ថានភាពសុខភាពសាធារណៈផ្សេងទៀត ដែលកំណត់ដោយក្រសួងសុខាភិបាល»។

រូបឯកសារ៖ លោក ម៉ម ប៊ុនហេង (ខាងឆ្វេង) រដ្ឋមន្រ្តីក្រសួងសុខាភិបាល កំពុងបំភ្លឺក្នុងរដ្ឋសភាពាក់ព័ន្ធនឹងភាពមិនប្រក្រតីក្នុងវិស័យសុខាភិបាលនៅថ្ងៃទី២៩ ខែធ្នូ ឆ្នាំ២០១៦។ (កាន់ វិច្ឆិកា/VOA)

លោក ម៉ម ប៊ុនហេង រដ្ឋមន្ត្រីក្រសួងសុខាភិបាល បានថ្លែងប្រាប់អង្គព្រឹទ្ធសភាថា នៅមុនពេលដាក់ឲ្យប្រតិបត្តិការនៃអាជ្ញាបណ្ណបញ្ជានេះនៅប្រទេសកម្ពុជា រដ្ឋាភិបាលកម្ពុជាត្រូវផ្តល់ដំណឹងដល់អង្គការពាណិជ្ជកម្មពិភពលោកផងដែរ។ នេះបើតាមឃ្លីបវេដេអូរបស់ព្រឹទ្ធសភាដែលចែករំលែកដល់អ្នកសារព័ត៌មានតាមប្រព័ន្ធទំនាក់ទំនងសង្គមតេឡេក្រាម (Telegram)។

លោក ម៉ម ប៊ុនហេង ត្រូវបានឃើញក្នុងឃ្លីបវេដេអូនោះ និងថ្លែងថា៖

«ប៉ុន្តែ យើងផ្តល់ឲ្យអាជ្ញាប័ណ្ណ ក៏យើងជូនព័ត៌មានទៅអគ្គក្រុមប្រឹក្សានៃអង្គការពាណិជ្ជកម្មក្រៅប្រទេស ពាណិជ្ជកម្មពិភពលោកដែរ មុននឹងប្រតិបត្តិនៅកម្ពុជានេះ»។

VOA មិនទាន់អាចទាក់ទងលោក ម៉ម ប៊ុនហេង រដ្ឋមន្ត្រីក្រសួងសុខាភិបាល ដើម្បីសុំការអធិប្បាយបន្ថែមពីលោកបានទេ នៅថ្ងៃពុធនេះ ដោយទូរស័ព្ទលោករោទ៍តែគ្មានអ្នកទទួល។

យោងតាមសេចក្តីប្រកាសដដែលរបស់ព្រឹទ្ធសភា បានឲ្យដឹងសេចក្តីព្រាងច្បាប់ស្តីពី អាជ្ញាប័ណ្ណបញ្ជាសម្រាប់សុខភាពសាធារណៈ ក៏មានគោលដៅកំណត់លក្ខខណ្ឌ បែបបទ និងនីតិវិធីនៃការផ្តល់ និងការអនុវត្តន៍អាជ្ញាប័ណ្ណបញ្ជាសម្រាប់សុខភាពសាធារណៈ។

សេចក្តីព្រាងច្បាប់ដែលមាន៥ជំពូក និងមានមាត្រា២៤នេះ មានវិសាលភាពពាក់ព័ន្ធនឹងផលិតផលឱសថ ដែលការពារដោយប្រកាសនីយបត្រតក្កកម្ម ក្នុងកាលៈទេសៈប្រទេសជាតិមានភាពអាសន្ន ឬកាលៈទេសៈបន្ទាន់បំផុត។

លោក អ៊ុំ សារិទ្ធ អគ្គលេខាធិការ និងជាអ្នកនាំពាក្យព្រឹទ្ធសភា មិនធ្វើការអធិប្បាយបន្ថែមទៅលើខ្លឹមសារនៃសេចក្តីព្រាងច្បាប់ដែលទើបតែនឹងត្រូវបានអនុម័ត ដោយព្រឹទ្ធសភា។ លោកបានបង្វែរសំណួរ ទៅលើអ្នកស្រី មាន សំអាន ប្រធានគណៈកម្មាធិការសុខាភិបាល និងសង្គមកិច្ចនៃព្រឹទ្ធសភា។

អ្នកស្រី មាន សំអាន សមាជិកព្រឹទ្ធសភាមកពីគណបក្សប្រជាជនកម្ពុជា និងជាប្រធានគណៈកម្មាធិការសុខាភិបាល និងសង្គមកិច្ចនៃព្រឹទ្ធសភា មានប្រសាសន៍ថា សេចក្តីព្រាងច្បាប់ អាជ្ញាប័ណ្ណបញ្ជាសម្រាប់សុខភាពសាធារណៈមាន គោលដៅបម្រើដល់ប្រជាពលរដ្ឋកម្ពុជា នៅពេលមានគ្រោះអាសន្នណាមួយកើតឡើង ពោលគឺ គ្រោះធម្មជាតិជាដើម។

អ្នកស្រីមានប្រសាសន៍ថា៖

«ជាការពិតហើយ នៅពេលដែលប្រទេសយើងមានករណីគ្រោះអាសន្នធ្ងន់ធ្ងរដូចជាគ្រោះធម្មជាតិ ឬក៏គ្រោះបង្កឡើងដោយមនុស្សក្តី ដូច្នេះគឺអាចបញ្ជាបាន ដើម្បីធ្វើយ៉ាងណាធានាបាននៅក្នុងការការពារនូវ ផ្តល់នូវសេវាសុខភាពសាធារណៈ ដើម្បីឲ្យទាន់ពេលវេលា នៅពេលដែលមាន ប្រទេសយើងដែលមានគ្រោះអាសន្នអ្វីមួយ»។

អ្នកស្រីមានប្រសាសន៍បន្តថា ការបញ្ជាទិញឱសថ អាចនឹងធ្វើឡើង ទៅតាមកាលៈទេសៈ នៃស្ថានភាពឆ្លងរបស់មេរោគជាក់លាក់ណាមួយ។

អ្នកស្រីថ្លែងថា៖

«ប្រភេទឱសថហ្នឹង សំខាន់សំដៅថា តើបញ្ហាអីដែលជាបញ្ហា ជាបន្ទាន់ ឧទាហរណ៍ដូចជា បញ្ហាគ្រោះអាសន្នដែលបង្កឡើងដោយជំងឺឆ្លង ឬក៏អាសន្នរោគ ឬក៏បញ្ហាអីមួយ ហើយទាមទារចាំបាច់ត្រូវតែធ្វើជាបន្ទាន់នោះ គឺវាទៅ អាស្រ័យទៅដោយស្ថានភាពជាក់ស្តែងនៅពេលវេលានីមួយៗ»។

ការប្រជុំព្រឹទ្ធសភាកម្ពុជាសម្រាប់នីតិកាលទីបី ដែលជិតនឹងផុតអាណត្តិនេះ កើតមានឡើង ក្រោយការបោះឆ្នោតព្រឹទ្ធសភាដ៏ចម្រូងចម្រាសកាលពីខែកុម្ភៈឆ្នាំ ២០១៨ ដោយគ្មានការចូលរួមពីគណបក្សប្រឆាំងសង្គ្រោះជាតិ ដែលត្រូវបានរំលាយតាមបណ្តឹងរបស់រដ្ឋាភិបាល។ ការបោះឆ្នោតនេះ បានរងការរិះគន់ពីសហគមន៍អន្តរជាតិ ដែលជាប្រទេសលើកកម្ពស់ការគោរពសិទ្ធិមនុស្ស និងសិទ្ធិនយោបាយថា ជាការបោះឆ្នោតដែលមិនត្រូវបានធ្វើឡើងតាមគោលការណ៍ប្រជាធិបតេយ្យពេញលេញ ពោលគឺមានការបិទសំឡេងអ្នកជំទាស់។

យ៉ាងណាក្តី ព្រះមហាក្សត្រព្រះករុណាព្រះបាទសម្តេចព្រះបរមនាថនរោត្តម សីហមុនី នឹងយាងធ្វើជាព្រះរាជអធិបតី កិច្ចប្រជុំនីតិកាលទីបួនលើកដំបូងរបស់ព្រឹទ្ធសភា ដែលបន្តស្ថិតក្រោមការគ្រប់គ្រងរបស់គណបក្សកាន់អំណាច នៅថ្ងៃទី២៣ ខែមេសា ខាងមុខ៕

សមត្ថកិច្ចបិទទ្វាររបងការិយាល័យបោះឆ្នោត

អ្នកនាំពាក្យក្រសួងមហាផ្ទៃលោក ខៀវ សុភ័គ

នាយករដ្ឋមន្ត្រីវៀតណាម លោក ង្វៀន ស៊ុងហ៊្វុក

ព្រឹទ្ធសភាកម្ពុជាសម្រាប់នីតិកាលទីបី ដែលជិតនឹងផុតអាណត្តិ

ទិដ្ឋភាពទឹកជំនន់នៅខ្សែទឹកខាងលើនៃភូមិស្រែគរចាស់