ក្នុងរយៈពេលពីរថ្ងៃជាប់ៗ គ្នា គឺពីថ្ងៃទី១៨ និងទី១៩ ខែមេសា មានការតម្លើងតំណែង ផ្តល់គោរមងារកិត្តិយស ដល់កូនចៅ និងមន្រ្តីបក្សកាន់អំណាចជាបន្តបន្តាប់ ស្របពេលដែលការបោះឆ្នោតជាតិ កាន់តែខិតជិតចូលមកដល់។ លោក ប៊ិន ឈិន ជាសមាជិកគណៈកម្មាធិការអចិន្រ្តៃយ៍គណបក្សប្រជាជនកម្ពុជា និងជារដ្ឋមន្រ្តីជំនួសលោក សុខ អាន ទទួលបន្ទុកទីស្តីការគណៈរដ្ឋមន្រ្តី បានទទួលគោរមងារកិត្តិយសជា “កិត្តិនីតិកោសលបណ្ឌិត”។ លោក គាត ឈន់ ជាសមាជិកគណៈអចិន្ត្រៃយ៍បក្ស និងជារអតីតរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ដែលសព្វថ្ងៃមានងារជាកិត្តិសេដ្ឋាបណ្ឌិតស្រាប់ទៅហើយនោះ ឥឡូវត្រូវបានតម្លើងថ្នាក់គោរមងារកិត្តិយស ទៅជា “កិត្តិបរិរក្សបណ្ឌិត”។ អ្នកស្រី ម៉ែន សំអន ដែលជាសមាជិកគណៈអចិន្ត្រៃយ៍បក្ស និងជារដ្ឋមន្ត្រីក្រសួងទំនាក់ទំនងជាមួយរដ្ឋសភា–ព្រឹទ្ធសភា និងអធិការកិច្ច បានទទួលគោរមងារជា “កត្តិសង្កហបណ្ឌិត”។ ចំណែកលោក ចម ប្រសិទ្ធិ រដ្ឋមន្ត្រីក្រសួងឧស្សាហ៍កម្ម និងសិប្បកម្ម ទទួលបានងារជា “កិត្តិសេដ្ឋាបណ្ឌិត” ស្របពេលដែលលោក អូន ព័ន្ធមុនីរ័ត្ន ជារដ្ឋមន្ត្រីក្រសួងសេដ្ឋកិច្ច ទទួលងារជា“អគ្គបណ្ឌិតសភាចារ្យ”។
កូនប្រុសច្បងរបស់លោក សុខ អាន ដែលជាកូនប្រសាររបស់លោក ហ៊ុន សែន ត្រូវបានតែងតាំងជា ប្រធានក្រុមប្រឹក្សាភិបាល ទូរគមនាគមន៍កម្ពុជា សម្រាប់អាណត្តិទី៥ ឆ្នាំ២០១៨ នេះ។ ការតែងតាំងនេះ គឺជាការបន្ថែមទៅលើមុខតំណែងមួយចំនួនធំរបស់លោក ដែលមានស្រាប់ ក្នុងតំណែងទាំងនោះ រួមមាន ជាអនុរដ្ឋលេខាធិការក្រសួងប្រៃសណីយ៍ និងទូរគមនាគមន៍ និងជាប្រធានសហព័ន្ធស្រូវអង្ករកម្ពុជា។
អ្នកវិភាគនយោបាយលោកបណ្ឌិត មាស នី លើកឡើងថា ប្រសិនបើការតែងតាំងលោក សុខ ពុទ្ធិវុធ នាពេលនេះ សមស្របទៅតាមសមត្ថភាពពិតប្រាកដរបស់លោកមែននោះ នោះការតែងតាំងនេះ នឹងមិនចោទជាបញ្ហាអ្វីឡើយ។ ក៏ប៉ុន្តែផ្ទុយទៅវិញ លោកថ្លែងថា ការតែងតាំងនេះនឹងក្លាយជាការពង្រីកបណ្ដាញសែស្រឡាយប្រព័ន្ធគ្រួសារនិយម ប្រសិនបើធ្វើឡើងដោយមិនត្រូវតាមជំនាញ សមត្ថភាព និងលក្ខខណ្ឌប្រកួតប្រជែងពិតប្រាកដនោះ។
ចំណែកកូនប្រុសលោក ហ៊ុន សែន គឺលោក ហ៊ុន ម៉ានី ឯណោះវិញ បើតាមប្រព័ន្ធឃោសនារបស់លោក ហ៊ុន សែន បានចុះផ្សាយថា កំពុងបំពេញតួនាទី ក្នុងការចុះបំពាក់មេដាយការពារជាតិ ជូនអតីតយុទ្ធជនរាប់រយនាក់ នៅខេត្តកំពង់ស្ពឺនៅថ្ងៃទី១៩ មេសា បើទោះបីការងារពាក់ព័ន្ធនឹងអតីតយុទ្ធជនបែបនេះ គួរតែជាភារកិច្ចរបស់មន្រ្តីខាងផ្នែកកងទ័ព។ លោក ហ៊ុន ម៉ានី ក្លាយជាតំណាងរាស្រ្ត កាលពីក្រោយបោះឆ្នោតជាតិឆ្នាំ២០១៣ ទោះបីលោកមិនជាប់ឆ្នោតយ៉ាងក៏ដោយ ព្រោះកាលណោះលោកឈរលេខរៀងទីបួន ប៉ុន្តែ គណបក្សប្រជាជនកម្ពុជា ទទួលបានតែបីអាសនៈប៉ុណ្ណោះ នៅខេត្តកំពុងស្ពឺ។ ប៉ុន្តែ មន្រ្តីជាប់ឆ្នោតក្នុងជួរគណៈបក្សកាន់អំណាច ត្រូវលាឈប់ពីតំណែង ដើម្បីទុកកៅអីនេះ ឲ្យលោក ហ៊ុន ម៉ានី បានកាន់តំណែងជាតំណាងរាស្រ្ត៕
